त्रिधाम भनेर परिचित हलेसी आउन धितुङे कलाकारले गीतमार्फत विनम्र अनुरोध गरेका छन् । गीतकार द्वारसिं राई, संगीतकार निराजन राई र गायक तथा गायिका लकेश राई र सविता राईले गीतमार्फत हलेसी आउन अनुरोध गरेका हुन् ।
गीतकार द्वारसिं राईले हलेसी आउन गीतमार्फत सजिलोगरी बाटो (लोकेसन) बताइदिएका छन् भने संगीतकार निराजन राईको संगीत त्यत्तिकै मिठासपूर्ण सुनिन्छ । गीतकार र संगीतकार राईद्वयको मिहिनेतलाई गायक लकेश राई र गायिका सविता राईले त्यत्तिकै न्याय गरेका छन् । दाबीसाथ भन्न सकिन्छ, ‘गीत श्रवणीय छ । सुनूँसुनूँ लागिरहन्छ ।’
हलेसीलाई केन्द्रबिन्दुमा राखेर लेखिएको गीतमा स्थानीय सांस्कृतिक, ऐतिहासिक र प्राकृतिक पर्यटकीय स्थलको नाम समेटिएका छन् ।
‘हलेसी नपुग्दै दर्शनार्थीलाई होलेसुङ पार्कले न्यानो स्वागत गर्छ,’ गीतले भन्छ, ‘हलेसी आएपछि किरात, हिन्दु, बुद्धको दर्शन एकैसाथ पाउन सकिन्छ ।’
हलेसी दर्शन गरेपछि महादेव, मुन्दुम, बुद्धले यहीं आशिर्वाद बर्साउँछ भनेर गीतले सन्देश प्रवाह गरेको छ ।
गीतमा हलेसी तुवाचुङ नगरपालिकाका तुवाचुङ, भुम्जु, जयरामघाट, सल्ले, बुङालुङ, होलेसुङ पार्क, लावाचुङ, बुला, लैकुखोला र सुनकोसी नदीले ठाउँ पाएको छ । यसैगरी, धरान, इटहरी, गाईघाट, जनकपुर, सोलुखुम्बु, दिक्तेल र सल्यानको सन्ध्याले पनि राम्रै स्थान पाएको छ ।
स्थानविशेषलाई समेटेर लेखिएको गीतको म्युजिक भिडियोसमेत सार्वजनिक भएको छ । धितुङका गीतकार, संगीतकार र गायक तथा गायिकाले गाएको म्युजिक भिडियो त्यत्तिकै सुन्दर बनेको छ ।
अमृता–अदिल प्रोडक्सनले तयार पारेको ‘काठमाडौंदेखि’ म्युजिक भिडियो निश्चल निष्कार्स च्यानलबाट सार्वजनिक गरिएको थियो । यो समाचार तयार पार्दासम्म उक्त म्युजिक भिडियो ६ हजार ५ सय ७२ जनाले हेरिसकेका छन् भने २ सय ३३ जनाले ‘लाइक’ गरेका छन् ।
म्युजिक भिडियो हेरिसकेपछि एकराज बुढाथोकीले टिप्पणी गरेका छन्, ‘दाजु हङकङमा बसेर पनि गाउँमा बस्ने कलाकारलाई माया गरिरहनुभएको छ । हार्दिक आभार व्यक्त गर्छु । साथै गायक लकेश राई र सविता राईको मार्मिक आवाज रहेको छ । हार्दिक शुभकामना ।’
स्मरण रहोस्, ‘काठमाडौंदेखि’ गीतका गीतकार, संगीतकार र गायक तथा गायिका हलेसी तुवाचुङ नगरपालिका–८ धितुङवासी हुन् ।
म्युजिक भिडियो तयार पार्ने र प्रवद्र्धनका लागि लागिपर्ने राई धितुङे (दुवै हङकङवासी) धितुङवासी नै हुन् ।
म्युजिक भिडियोले हलेसीको पर्यटन प्रवद्र्धन गर्न सघाउ पुर्याएको हलेसी तुवाचुङ नगरपालिकाका नगर प्रमुख इवन राईले बताए ।
गीतको पूर्ण अंश
गीतकार : द्वारसिं राई
संगीतकार : निराजन राई
स्वर : लकेश राई/सविता राई
काठमाडौंदेखि खुर्कोट हुँदै हलेसी आउनू है
किरात, हिन्दु, बुद्धको दर्शन एकैसाथ पाउनू है ।
होलेसुङ पार्कले स्वागत गर्छ, बुङालुङ मुस्काउँछ
महादेव, मुन्दुम, बुद्धले यहीं आशिर्वाद बर्साउँछ,
काठमाडौंदेखि खुर्कोट हुँदै हलेसी आउनू है ।
उदयपुर उषा, दिक्तेल दिवा तुवाचुङ आउने रे
सल्यानको सन्ध्या, सोलुको शान्ति यहीं नै छाउने रे,
बुला र लैकु, तुवाचुङबाट सुनकोसी झर्दै छ
उषा र दिवा, सन्ध्या र शान्ति नियाली हेर्दै छ
मुन्दुमी दर्शन, तीन चुला पुज्ने किराती संस्कार छन्
यो तपोभूमि आदिम थलो आँखीझ्याल बन्दछन् ।
जनकपुरदेखि जयरामघाट हुँदै हलेसी आउनू है ।
सल्ले, तुवाचुङ, भुम्जु, बुङालुङ प्राकृतिक सम्पदा
बहुल जाति, भाषी र धर्म यो हाम्रो विशेषता,
धरान, इटहरी, गाईघाट हुँदै हलेसी आउनू है
किरात, हिन्दु, बुद्धको दर्शन एकैसाथ पाउनू है ।
लावाचुङ पाटी स्वागत गर्छ तुवाचुङ मुस्काउँछ
महादेव, मुन्दुम, बुद्धले यहीं आशिर्वाद बर्साउँछ,
काठमाडौंदेखि खुर्कोट हुँदै हलेसी आउनू है ।
म्युजिक भिडियो हेर्न यहाँ क्लिक गर्नुहोला ।
