झापा । मेचीनगरको सहज महिला समृद्धि बहुउद्देश्यीय सहकारी संस्थाले किसानलाई तोरी खेतीका लागि अनुदान घोषणा गर्दै उत्पादन भएका किनिदिने भएको छ ।
सहकारीको हालै सम्पन्न साधारणसभाले स्थानीय किसानलाई तोरी खेतीप्रति आकर्षण गर्न प्रतिबिघा दुई हजार अनुदान दिने निर्णय गरेको संस्थाका अध्यक्ष शारदा शर्माले बताइन् । संस्थाले तोरी तेल उद्योग नै सञ्चालन गर्ने निर्णय गरेको छ ।
अध्यक्ष शारदा शर्माका अनुसार संस्थाले मेचीनगरका–९ देखि १५ सम्मका सबै तोरी किसानलाई प्रोत्साहनस्वरूप अनुदान उपलब्ध गराउनेछ । यो अनुदान मल र बीउ किन्नका लागि दिइएको हो ।
मेचीनगर–१० स्थित सहकारीले स्थापनाकालदेखि नै तोरीको शुद्ध तेल आफैंले उत्पादन गरी सदस्यलाई सहुलियतमा बिक्री गर्दै आएको छ । विगत वर्षदेखि संस्थाले भाडामा जग्गा लिई तोरी खेतीसमेत गर्दै आएको छ ।
आर्थिक वर्ष २०७६/०७७ मा एक करोड ४४ लाखको कारोबार गरेको संस्थाले यस वर्ष १२ बिघा जग्गा भाडामा लिएर आफैं तोरी खेती गर्ने तयारी गरेको छ ।
