तानसेन । पाल्पाको रामपुरमा व्यावसायिक फूलखेती फस्टाउँदै गएको छ । रामपुर नगरपालिका–४ देवीस्थानमा गएको तिहारमा पहिलोपटक सयपत्री फूलबाट मनग्य आम्दानी गरेका दिलबहादुर थापा तथा लालबहादुर थापाले बेमौसमी फूल खेतीसमेत सुरु गरेका छन् ।
सहरी रूपमा विकास हुन थालेको पाल्पाको पूर्वी भेग रामपुरमा पछिल्लो समय भारतलगायत छिमेकी देश र अन्य जिल्लाबाट फूलको आयात हुने गरेकाले यसलाई निरुत्साहित गर्दै व्यवसाय थालेको व्यवसायी दिलबहादुरको भनाइ छ । विवाह, अन्य मेला, महोत्सव र विविध सार्वजनिक कार्यक्रममा सयपत्री फूलको मालाको माग बढेकाले फूलखेती बेमौसमी रूपमा पनि गर्न थालेको उनले बताए ।
हाम्रो आधुनिक कृषि फर्म सञ्चालन गरी केही वर्ष पहिलेदेखि मौसमी बेमौसमी तरकारी खेती थालेका थापा दाजुभाइले पछिल्लो समय फूलको परीक्षण गरेपछि राम्रै हुने अनुभव लिएका छन् । गएको तिहारमा पनि फूलको गुच्छा, माला नारायणघाट, बुटवल, पोखरा, स्याङ्जा, तनहुँ र पाल्पाका विभिन्न स्थानमा बिक्री गरेर राम्रै आम्दानी भएको लालबहादुरले बताए । बेमौसममा झन बिक्री हुन्न कि भन्ने चिन्ता भए पनि रामपुरमा सञ्चालित महायज्ञलगायत विभिन्न कार्यक्रम, विवाहमा फूल खरिद गरेकाले राम्रै बिक्री भएको थियो ।
करिब साढे ११ रोपनी जग्गामा कृषि फर्म सञ्चालन गरे पनि करिब दुई रोपनी जग्गामा फूलखेती सञ्चालन गरेको दिलबहादुरले बताए । मागअनुसार पु¥याउन नसकिएको उनको भनाइ छ ।
सयपत्री फूलका कारण माटोलाई फाइदा हुने र किराले समेत नखाने हुँदा तरकारीभन्दा खेती गर्न गर्न सजिलो हुने उनीहरूको भनाइ छ । करिब १५ सय बिरुवाको उत्पादन बिक्री भइरहेको र अन्य थप ६०० बिरुवा रोपिसकिएको छ । ‘अब विवाह तथा प्रेमदिवसका अवसरमा गुलाब फूलको समेत माग भएकाले त्यसको खेती गर्ने सोच छ,’ दिलबहादुरले भने । गत तिहारमा करिब एक लाख ५० हजार फूलबाटै मात्र आम्दानी भएको र यसपालि मेमौसममा तीन लाखसम्म आम्दानी हुने आशा दाजुभाइको छ ।
प्रतिमाला १०० र प्रतिकेजी फूलको ४०० मा बिक्री हँुदै आएको छ । यसअघि वैदेशिक रोजगारीमा गएका युवाले नेपालमै पनि मिहिनेत गरे प्रतिफल राम्रो हुने विश्वास गरेका छन् ।
