यति निकटबाट पहिले
कहिल्यै देखेको थिइनँ
क्रोधले तातेको तिम्रो रातो अनुहार
यति निकटबाट पहिले
कहिल्यै सुनेको थिइनँ
आक्रोशले काँपेको तिम्रो चर्को आवाज
यति निकटबाट पहिले कहिल्यै गरेको थिइनँ
तिम्रो सघन पीडाको अनुभव
ए, मेरो प्यारो मधेस ।
ए, सुन्दर शस्य श्यामल प्रदेश

यति निकटबाट पहिले
कहिल्यै भएको थिएन
तिम्रो गहन संवेदनाको आशा
म पहाड हुँ, तिमी मधेस
म हिमाल हुँ, तिमी मैदान
ढुंगाको भर माटो तिमी हौ
माटाको भर ढुंगा म हुँ
म लाली गुराँस, तिमी रातो गुलाफ
म लालुपाते तिमी, लाल गुलमोहर
म शीतल बतास, तिमी न्यानो हावा
तिमी ग्रीष्म हौ म बर्सात् हुँ
तिमी शरद हौ म वसन्त हुँ
भिन्न–भिन्न पक्षीहरूको
भिन्न–भिन्न गानजस्तै
हाम्रो भाषा हाम्रो वेशभूषा
भिन्नाभिन्नै भए पनि
सप्तरंगी इन्द्रेणीको सप्तरंगी मालाजस्तै
हाम्रो रूपरङ्ग/हाम्रो मुखमुद्रा
भिन्नाभिन्नै भए पनि
ए, मेरो प्यारो मधेस ।
ए, सुन्दर शस्य श्यामल प्रदेश ।

हामी एउटै प्रकृतिका
भिन्न–भिन्न ऋतुहरू हौं
हामी एउटै फूलबारीका
भिन्न–भिन्न फूलहरू हौं
यति बेसरी पहिले
कहिल्यै अनुभूत भएको थिएन
हाम्रो अटुट र अभिन्न एकता
यति बेसरी पहिले
कहिल्यै प्रखर भएको थिएन
हाम्रो सजीव र सहज राष्ट्रबोध
ए, मेरो प्यारो मधेस ।
ए, सुन्दर शस्य श्यामल प्रदेश ।

यति बेसरी पहिले
कहिल्यै मुखर भएको थिएन
हाम्रो साझा र सचेत मुक्तिसंघर्ष
यतिखेर पानी धमिल्याएर कसैले
फुटको माछा मार्न चाहेको हुन सक्छ
होश गर/ हाम्रै घर डढाउन
कसैले विद्वेषको आगो झोसेको हुन सक्छ
एउटै विगतका सझियार हामी
आँखा खोलेर राम्ररी हेर
कताको आँप कताको हाम्रो झटारो
हामीलाई जुधाउन कसैले
उन्मादको आगोमा
आवेशको घ्यु थपेको हुन सक्छ
एउटै कर्मभूमिका दायाँबायाँ हात हामी
एउटै मातृभूमिका दायाँबायाँ काँध हामी
एउटै पितृभूमिका दायाँबायाँ पाठ हामी
हाम्रो साझा गन्तव्यको
हाम्रो साझा तगारो एउटै छ
ए, मेरो प्यारो मधेस ।
ए, सुन्दर शस्य श्यामल प्रदेश ।

एउटै साज र आवाजका
एउटै होस्टे र हैंसे हामी
हाम्रो साझा भविष्यको
हाम्रो साझा गोठालो एउटै छ ।